श्री शिवरायांचा पोवाडा
रचना
नंदन हेर्लेकर
प्रथम वंदुया भारतमाता
आई भवानी तुळजेला
आणि गुरुजन वंदुन गातो
मर्दुमकीच्या कवनाला
जी जी रं जी जी रं जी जी रं जी.....
म्लेंच्छ शक्तिच्या आक्रमणाने फुटली छाती मर्दांची
लाचारीची, नैराश्याची कशी दुर्गती देशाची
कधी मोगली कधी फिरंगी अब्रू लुटती आर्यांची
बुडे धर्मही ध्वस्त मंदिरे गणति न अत्याचाराची
जी जी रं जी जी रं जी जी रं जी....
फडकला, फडकला, भगवा झेंडा फडकला
शिवनेरीच्या जरीपटक्याने अवघा देश चेतविला
पेटुन उठला मर्द मराठा, सह्याद्रीही सळसळला
छत्रपती शिवराजा हो ........
छत्रपती शिवराजा बनला नरसिंहाचा नव अवतार
मुजरा करुन गर्वाने गातो मर्दुमकीच्या कवनाला
जी जी रं जी जी रं जी जी रं जी....
धैर्य नवे देशास मिळाले धार मिळे तलवारीला
मर्दांची मनगटे जाहली बळकट देशसेवेला
शतकांचा अंधार नष्ट तो झाला उजळे सृष्टीला
शिवरायांच्या जयजयकारे स्फूर्ती मराठभूमीला
म्हणुनी आजही आम्ही गातो मर्दुमकीच्या कवनाला
जी जी रं जी जी रं जी जी रं जी.......
No comments:
Post a Comment